Тошкентдаги хусусий клиникада вафот этган эркак ҳолати юзасидан жиноят иши қўзғатилди
Тошкент шаҳрининг Олмазор туманидаги хусусий клиникалардан бирида эркак бурун операцияси олдидан вафот этди. Бош прокуратура матбуот хизмати жиноят иши қўзғатилгани ҳақида хабар берди.
Маълум қилинишича, жорий йилнинг 12 ноябрь куни 1994 йилда туғилган фуқаро Ҳ.Д. Олмазор туманида жойлашган хусусий клиникага «чап томонлама бурун кистоз гаймарити, ўнг томонлама ўрта бурун чиғаноғи кўндхо буллёзи вазаматор ринит» ташхиси билан мурожаат қилган.
Шундан сўнг, жарроҳлик амалиёти жараёнида соат 12:20 ларда пульс кўрсаткичлари йўқолиб, юрак фаолияти тўсатдан тўхтаб қолган ва биологик ўлим ҳолати юз берган.
Республика суд-тиббий экспертиза илмий-амалий маркази Тошкент шаҳар филиали Морфология бўлимининг дастлабки маълумотномасига кўра, ўлимга ўткир анафилактик шок сабаб бўлган. Ҳозирда ўлимнинг аниқ сабабини аниқлаш учун суд-тиббий экспертиза тайинланган.
Мазкур ҳолат юзасидан Олмазор туман прокуратураси томонидан хусусий клиника шифокорларига нисбатан Жиноят кодексининг 116-моддаси (касб юзасидан ўз вазифаларини лозим даражада бажармаслик) 4-қисми «а» банди билан жиноят иши қўзғатилиб, дастлабки тергов ҳаракатлари олиб борилмоқда.
