АҚШ ва Хитой Женевада савдо музокараларини бошлайди
11 май куни АҚШ молия вазири Скотт Бессент ва бош савдо музокарачиси Жеймисон Грир Швейцариянинг Женева шаҳрида Хитой бош вазири ўринбосари, иқтисодий масалалар бўйича масъул расмий Хе Лифенг билан учрашади. Бу ҳақда Reuters хабар берди.
Бу музокаралар глобал иқтисодиётга салбий таъсир кўрсатаётган савдо урушини юмшатиш бўйича дастлабки қадам сифатида кўрилмоқда.
АҚШ расмийларининг сешанба куни эълон қилган баёнотига кўра, Женевадаги учрашувда бож ставкаларининг умумий камайтирилиши, айрим маҳсулотларга қўлланилган божлар, экспорт назорати, шунингдек, арзон импортлар учун амал қилган имтиёзларининг бекор қилиниши каби масалалар муҳокама қилинади.
Хабарга кўра, Скотт Бессент божлар даражасини савдо эмбаргосига тенглигини айтган ва музокаралар аввалида кескинликни камайтириш зарурлигини таъкидлаб ўтган.
Шунингдек, музокараларга тайёргарлик доирасида Хитой ҳам АҚШ таклифини кўриб чиқаётганини билдирган эди. Хитой Савдо вазирлиги эса расман учрашувда иштирок этишини тасдиқлаган.
Трамп маъмурияти Хитойдан импорт қилинадиган маҳсулотларга 145% гача, Хитой эса жавобан АҚШ маҳсулотларига 125% гача бож жорий қилган эди.
Қайд қилинишича, ушбу музокаралар аниқ натижаларга олиб келувчи жараённинг бошланиши эмас, балки кескинликни камайтиришга қаратилган илк қадам сифатида баҳоланмоқда.
Молия вазири Трамп маъмурияти 17 та йирик савдо ҳамкорлари билан музокаралар олиб бораётгани ва уларнинг баъзилари билан савдо келишувларини шу ҳафтадаёқ эълон қилиши мумкинлигини айтиб ўтган.
