Баскетбол федерацияси мутасаддилари қарийб ярим миллиард сўмни талон тарож қилишди

Ўзбекистон Баскетбол федерацияси мансабдор шахслари буджет маблағларини талон тарож қилиб, ўзлаштирган, деб хабар бермоқда Бош прокуратура матбуот хизмати.

Маълумотларга кўра, федерация менежери С.И. ижрочи директор Ю.С. билан тил бириктириб, қариндошлари номига расмийлаштирилган корхона ҳисоб рақамига 197 миллион сўм ўтказиб юборган. Шунингдек улар, бу пулларни спортчиларнинг соғлиғини назорат қилиш учун ускуналар сотиб олишга сарфлаганини айтган. Бироқ ҳеч қандай нарсаларни сотиб олмаган.

Шунингдек, федерациянинг 1-вице президенти Х.Г. федерацияга тегишли бўлган корпоратив пластик картадан ноқонуний равишда шахсий эҳтиёжлари учун 162 млн сўм маблағни ечиб олиб, ўзлаштирган, — дейилади хабарда.

Бундан ташқари, мансабдор шахслар ҳомийларни жалб қилиш бўйича хизматлар кўрсатиш бўйича сохта шартнома тузган. Шу тариқа 130 миллион сўм ўз эҳтиёжлари учун сарфланиб юборилган.

Аниқланган қонунбузарликлар юзасидан Жиноят кодексининг тегишли моддалари билан жиноят иши қўзғатилиб, айбдорлар жавобгарликка тортилди.