Енгил саноатни ривожлантириш агентлиги ташкил қилинади

Президент Шавкат Мирзиёев 13 август куни бўлиб ўтган видеоселекторда, мамлакатда Енгил саноатни ривожлантириш агентлиги ташкил қилинишини эълон қилди.

Хусусан, жаҳонда савдо қоидаларининг тез ўзгариши ёки логистикадаги узилишлар тўхтамаётгани шароитида тўқимачилик тармоғини ривожлантиришга алоҳида ёндашувлар зарурлиги қайд этилди. Шу сабабли президент Енгил саноатни ривожлантириш агентлиги ташкил қилинишини маълум қилди.

Агентлик тўқимачилик, чарм ва ипак саноатига масъул бўлиши атилмоқда. Шунингдек, унга инвестициялар, саноат ва савдо вазирининг биринчи ўринбосари Нозимжон Холмуродов раҳбарлик қилиши айтилди.

Агентликнинг алоҳида жамғармаси бўлади, давлат кўмаги, шунингдек тўқимачилик корхоналарига арзон айланма маблағ шу жамғарма орқали берилади. Жамғармага 200 миллион доллар ажратилади, — дейилади хабарда.

Янги агентликка, таннарх, ишлаб чиқариш ва экспорт бўйича ечимлар ишлаб чиқиш, божхона ҳудудида қайта ишлаш режими орқали тайёр маҳсулот экспортини 2 баробарга ошириш, кооперацияни кучайтириб, паст қувватда ишлаётган корхоналарни соғломлаштириш чораларини кўриш топширилди.

Халқаро консультантлар билан биргаликда тўқимачиликни 2030 йилга қадар ривожлантириш дастурини ишлаб чиқиш ҳамда чарм, ипак ва гиламчилик саноатини ривожлантириш бўйича ҳам таклифларни киритиш вазифаси қўйилди.

Ҳокимлар, кластерлар ва тўқимачилик корхоналари раҳбарлари бир нарсани билиши керак. Ҳозирги шароитда бюджетга 1 сўм қўшимча тушум қилиш қанча қийин бўлаётганини тушунган тушунади. Бугун айтилган қўллаб-қувватлаш чораларини пулга чақса, 7 триллион сўм бўлади. Энди шунга яраша натижа ҳам бўлиши керак, — деди президент.

Йиғилишда белгиланган вазифалар ижроси устидан қатъий назорат ўрнатиш топширилди.