Мирзиёев Чехия, Иордания, Албания ва Жанубий Корея етакчилари билан учрашди
Ўзбекистон президенти Шавкат Мирзиёев БМТ Бош Ассамблеясининг 80-юбилей сессияси доирасида, бир қатор мамлакатлар етакчилари билан учрашув ўтказди.
Мирзиёев, Корея Республикаси президенти Ли Чжэ Мён билан учрашиб, икки мамлакат алоҳида стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалаларини кўриб чиқди.
Хусусан, Корея халқаро ҳамкорлик агентлиги, Корея Эксимбанки ва унинг фондлари билан кўп йиллар давомида самарали шериклик қилиб келинаётгани, лойиҳаларнинг умумий портфели 3,5 миллиард долларга етганига юксак баҳо берилди. Шу жумладан «Марказий Осиё — Корея Республикаси» форматида ҳамкорлик масалалари юзасидан фикр алмашилди.
Ўзбекистон етакчиси, шу қатори Албания Президенти Байрам Бегай билан хам музокара ўтказиб, сиёсий-дипломатик, савдо-иқтисодий ва маданий-гуманитар соҳаларда ўзаро манфаатли ҳамкорликни ривожлантириш масалалари кўриб чиқилди.
Икки томонлама муносабатларни, шу жумладан сиёсий мулоқот ва иқтисодий ҳамкорлик механизмларини яратиш орқали сифат жиҳатидан янги даражага олиб чиқишга ўзаро қизиқиш билдирилди.
Савдо ва инвестиция соҳаларидаги ҳамкорлик салоҳиятини рўёбга чиқариш, аграр ва озиқ-овқат саноати, транспорт ва бошқа соҳаларда кооперация лойиҳаларини амалга ошириш муҳимлиги қайд этилди.
Шунингдек, Шавкат Мирзиёев Иордания Подшоҳи Абдулла II ибн ал-Ҳусайн билан учрашув ўтказди. Унда жорий йил август ойида Ўзбекистон Республикасига амалга оширилган олий даражадаги ташриф давомида эришилган келишувларни ижроси муҳокама қилинди.
Ўзбекистон ва Иорданиянинг етакчи компаниялари иштирокидаги устувор инвестиция лойиҳаларини амалга оширишни жадаллаштириш бўйича ўзаро мувофиқлашган чора-тадбирлар кўришга алоҳида эътибор қаратилди.
Бундан ташқари, президент Чехия Республикаси етакчиси Петр Павел билан қисқа учрашув ўтказиб, cавдо-иқтисодий ҳамкорликни янада кенгайтириш масалалари кўриб чиқилди. Савдо, инвестициялар, инновациялар, транспорт, қишлоқ хўжалиги ва бошқа устувор йўналишларда кооперацияни ривожлантириш бўйича аниқ лойиҳалар муҳокама қилинди. Идоралараро алоқаларни фаол давом эттиришга келишиб олинди.
