Мирзиёев ва Путин Ўзбекистондаги АЭСнинг биринчи энергия блоки қурилишига старт берди
Лойиҳанинг амалга оширилиши Ўзбекистоннинг технологик, саноат ва илмий тараққиётида янги босқични бошлаб беради
Ўзбекистон етакчиси Шавкат Мирзиёев ва Россия президенти Владимир Путин Ўзбекистонда интеграциялашган атом электр станциясининг биринчи энергия блокини қуриш ишларига старт бердилар.
Маросимда телекўприк орқали Халқаро атом энергияси агентлиги (XAЭA) бош директори Рафаэль Гросси ҳам иштирок этди.
Ўзбекистон раҳбари Владимир Путин ва Рафаэль Гроссига ушбу лойиҳанинг рўёбга чиқарилишини шахсан қўллаб-қувватлаганлари ва кўрсатилган эътибор учун миннатдорлик билдирди. Мамлакатда биринчи атом электр станциясини барпо этишда иштирок этаётган Ўзбекистон ва Россия мутахассисларига биргаликдаги саъй-ҳаракатлар ва юксак профессионаллик учун алоҳида ташаккур айтилди.
Мазкур лойиҳанинг амалга оширилиши Ўзбекистоннинг технологик, индустриал ва илмий тараққиётида янги босқични бошлаб бериб, янги тармоқ – атом энергетикасини ривожлантириш учун асос яратиши қайд этилди. Лойиҳа кичик модулли атом генерацияси ҳамда йирик ҳажмли энергетика соҳасидаги энг сўнгги ютуқларни ўзида мужассам этган.
Ўзбекистон етакчиси хавфсизлик лойиҳанинг мутлақ ва сўзсиз шарти эканини алоҳида таъкидлади. Станцияни қуриш ва уни эксплуатацияга тайёрлаш ишлари энг замонавий халқаро стандартлар, илғор муҳандислик ечимлари асосида ҳамда Халқаро атом энергияси агентлигининг доимий назорати остида бажарилмоқда.
Ушбу улкан лойиҳанинг амалга оширилиши ва унинг натижалари Ўзбекистон – Россия кенг қамровли стратегик шериклик ва иттифоқчилик муносабатларини янада мустаҳкамлашга хизмат қилишига ишонч билдирилди.
