Навоийда босқинчилик содир этган рецидивистга нисбатан ҳукм ўқилди

Судланувчи хонадонга ноқонуний кириб, қизни боғлаб қўйган ва олтин тақинчоқларни ўғирлаб кетган

Навоий вилоятининг Кармана туманида рецидивистга нисбатан ҳукм ўқилди, хабар беради Олий суд матбуот хизмати.

Жорий йилнинг апрель ойида судланувчи босқинчилик қилиш мақсадида хонадонлардан бирига ноқонуний равишда кирган. У юзига оқ марли ниқоб тақиб, ошхона пичоғи билан қуролланган.

Уйга киргач, эркак ётоқхонада бўлган ёш қизга ҳужум қилган. Қиз унга фаол қаршилик кўрсатган. Судланувчи унинг қўл ва оёқларини камар билан боғлаб, пичоқ билан таҳдид қилган ҳамда пуллар қаердалигини айтишни талаб қилган.

У хонани тинтув қилди. Жовондаги сумканинг камарини олиб, қўлларимни боғлади. Сўнг яна пичоқ тақаб, пуллар қаердалигини сўради, — деди жабрланувчи суд мажлисида.

Эркак олтин тақинчоқларни олиб, жиноят жойидан яширинган. У эртаси куни қўлга олинган.

Муқаддам ушбу эркак турли жиноятлар учун бир неча бор жавобгарликка тортилиб, хавфли рецидивист деб топилган. У Жиноят кодексининг 164-моддаси (босқинчилик) 4-қисми «б» банди билан айбли деб топилиб, 15 йил муддатга озодликдан маҳрум қилиш жазосига ҳукм қилинди.