Ўзбекистонда тиббиёт кластерлари ташкил этилади
Ўзбекистонда тиббиёт кластерлари ташкил этилиши маълум қилинди.
Маълум қилинишича, ҳудудларда тиббий хизмат кўрсатиш барча йўналишлар бўйича бир жойга мужассамлаштирилиши илғор ва самарали амалиёт бўлиб, Янги Ўзбекистоннинг тараққиёт стратегиясида бу борада ҳам тегишли вазифалар мавжуд. Хусусан:
- Наманган, Фарғона, Сирдарё, Қашқадарё, Навоий вилоятлари ва Тошкент шаҳрида тиббиёт кластерлари ташкил этилади;
- Қашқадарёда болалар шифохонаси, туғуруқ комплекси, скрининг маркази, репродуктив саломатлик маркази жойлашган мужассам бир комплекс — «Она ва бола» кластери барпо этилади.
Таъкидланишича, ушбу кластер бола туғилишидан бошлаб, то 18 ёшга тўлгунга қадар бир жойда комплекс тиббий хизмат олиш имконини беради.
Шунингдек, Чирчиқ, Янгийўл, Олмалиқ, Нурафшон шаҳарларида ҳамда Шайхонтоҳур туманида поликлиника ва стационар муассасаларни бирлаштирган ҳолда аҳолига тиббий хизмат кўрсатишда қулайликлар яратилади.
