Тошкент аэропортида Дубайга олиб кетилаётган деярли 2 кг олтин тўхтатиб қолинди

Фуқаро олтин қуймаларини чемоданнинг ички қисмига яширган ҳолда ўтказмоқчи бўлган.

Тошкент халқаро аэропортида катта миқдордаги олтин қуймаларнинг мамлакатдан ноқонуний олиб кетилишига чек қўйилди. Бу ҳақда Давлат хавфсизлик хизмати хабар берди.

Хусусан, «Тошкент – Дубай» йўналиши бўйича парвоз қилишни режалаштирган, 1980 йилда Андижон вилоятида туғилган, ҳозирда Тошкент шаҳрида яшовчи шахснинг юклари текширувдан ўтказилди.

Натижада унга тегишли чемоданнинг ички таянч қисмига жами 1 кг 923 гр олтин қуймалар яширилганлиги аниқланиб, ашёвий далил сифатида расмийлаштириб олинади.

Шунингдек, ушбу ноқонуний ишга 1992 йилда Тошкент вилоятида туғилган, муқаддам Жиноят Кодексининг 182-моддаси билан судланган фуқаронинг алоқадорлиги аниқланади.

Ҳозирда ҳолат юзасидан терговга қадар текширув ҳаракатлари олиб борилмоқда.