Тошкентда автобусларда чиптасиз юрган йўловчилар жаримага тортилмоқда
Тошкент шаҳри жамоат транспортини мониторинг ва назорат қилиш давлат муассасаси билан биргаликда автобусларда йўл ҳақини тўламасдан тушиб кетаётган йўловчиларни аниқлаш бўйича кучайтирилган рейдлар бошланди, дея хабар бермоқда Транспорт назорати инспекцияси.
Қайд этилишича, аксарият йўловчилар тўловларни ўз вақтида амалга ошириб, «тизим қулайлигини эътироф этаётган бир паллада, айримлар йўл ҳақини ҳеч қандай сабабсиз тўламасдан автобусдан тушиб кетаётгани» тез-тез учраб турибди.
«Тошшаҳартрансхизмат» компаниясининг аниқлик киритишича, чиптасиз юрганларни жаримага тортиш 14 март санасидан бошланган. Хусусан, 1 апрелга қадар жами 56 кишига шундай чора кўрилган.
Уларга Маъмурий жавобгарлик тўғрисидаги кодекснинг 144-моддаси 5-бандига асосан йўловчининг шаҳар ичида ва шаҳар атрофига қатнайдиган автобусда чиптасиз юриши БҲМнинг ўндан бир қисми — 37 минг сўм миқдорида жарима солинади.
Тўлов бир марталик QR-чипталар ёрдамида амалга оширилганда, уни сафар давомида сақлаб қолиш ҳамда назоратчи ва инспекторларнинг сўровига асосан уларга кўрсатиш лозим. Ходимлар бундай текширувларни ҳар куни ўтказади.
