Ўзбекистонда 3 ой ичида чиқинди ташлаш билан боғлиқ 2 мингдан ортиқ ҳуқуқбузарлик аниқланди

Ўзбекистонда 3 ой давомида рухсат этилмаган жойларга чиқинди ташлаш бўйича 2 мингдан зиёд ҳуқуқбузарлик қайд этилди. Бу ҳақда Чиқиндиларни бошқариш ва циркульяр иқтисодиётни ривожлантириш агентлиги хабар берди.

Қайд этилишича, республиканинг кўплаб ҳудудларида онлайн кузатув камералари ўрнатилган. Ушбу камералар орқали белгиланмаган жойларга чиқинди ташлаш билан боғлиқ қатор ҳуқуқбузарликлар содир этилаётгани маълум бўлган.

Жумладан, 2026-йилнинг дастлабки 3 ойида республикада чиқинди билан боғлиқ жами 2 107 та қоидабузарлик ҳолати аниқланган. Шундан 322 та ҳуқуқбузарлик бўйича маъмурий жавобгарлик қўлланилиб, жарималар ундирилган. Қолган 1 785 та қоидабузарликка қонунчиликда белгиланган тартибда чоралар белгиланмоқда.

Маълумот учун, республиканинг деярли барча ҳудудларида жами 700 га яқин онлайн кузатув камераси ўрнатилган бўлиб, улар нафақат чиқинди ташлаш, балки бошқа турдаги экологик ҳуқуқбузарликларни ҳам аниқлайди.