Самарқандда «Lacetti» машинаси катта тезликда дўконга бориб урилди
Самарқанд вилояти Каттақўрғон туманида йўл-транспорт ҳодисаси содир бўлиб, унинг натижасида бир киши жабрланди. Бу ҳақда вилоят ЙҲХБ матбуот хизмати хабар беради.
Йўл-транспорт ҳодисаси 3 сентябрь куни соат 16:20 атрофида, Каттақўрғон тумани «Мундиён» МФЙ ҳудудидан ўтувчи «Зарафшон трактининг ўнг қирғоғи» 4Р-48 автомобиль йўлининг 98-километрида содир бўлган.
Аниқлик киритилишича, «Lacetti» ҳайдовчиси йўлнинг қия қисмида катта тезликда ҳаракатланиб, бошқарувни йўқотган ва озиқ-овқат дўконига бориб урилган.
Оқибатда дўкон ичида бўлган 1 нафар фуқаро тан жароҳати олиб, касалхонага етказилган.
Ҳозирда воқеа юзасидан дастлабки суриштирув ишлари олиб борилмоқда.
