Ўзбекистонда Telsartan H дорисининг айрим серияси муомаладан қайтариб олинмоқда
Dr. Reddy’s Laboratories Ltd компанияси томонидан Telsartan H дори воситасининг айрим серияси муомалададан қайтариб олинмоқда. Бу ҳақда ССВ ҳузуридаги Фармацевтика маҳсулотлари хавфсизлиги маркази давлат муассасасининг расмий каналида хабар қилинди.
Ишлаб чиқарувчи томонидан ўтказилган сифат назорати ва барқарорлик синовлари натижаларига кўра, Telsartan H 80 mg/12,5 mg дори воситасининг C2501976 сериясида фаол модда гидрохлоротиазид миқдорининг белгиланган меъёрлардан четга чиққанлиги аниқланган, — дейилади хабарда.
Мазкур ҳолат дори воситасининг сифат кўрсаткичларига оид номувофиқлик сифатида баҳоланган. Таъкидланишича, Ўзбекистон Республикаси ҳудудида муомалага киритилган C2501977 серияси бўйича фаол модда миқдорига оид бундай номувофиқлик қайд этилмаган.
Бироқ ушбу серия, номувофиқлик аниқланган серия билан бир хил ишлаб чиқариш лотига мансуб фаол моддадан ишлаб чиқарилганлиги сабабли, дори воситалари муомаласи хавфсизлигини таъминлаш ҳамда эҳтимолий хавфларнинг олдини олиш мақсадида, профилактик чоралар доирасида бозордан қайтариб олинмоқда.
Юқорида кўрсатилган сериядаги Telsartan H 80 mg / 12,5 mg препаратини сотиб олган фуқаролардан ушбу дори воситасини истеъмол қилмасликлари, агар у аввалдан мавжуд бўлса, ундан фойдаланмасликлари, шунингдек зарурат туғилганда даволовчи шифокор билан маслаҳатлашган ҳолда муқобил дори воситасини танлашлари сўралади, — деб билдирилди.
Эслатиб ўтамиз, аввалроқ «Nestle Food» компанияси хавфли токсин сабаб Ўзбекистон ҳудудидан болалар озуқаси маҳсулотларининг чекланган миқдорини ихтиёрий равишда қайтариб олаётгани хабар қилинган эди.
