АҚШда Исроил элчихонасининг икки ходими отиб ўлдирилди
21 май куни Вашингтон штатидаги Яҳудий музейи олдида Исроил элчихонасининг икки ходими отиб ташланди. Бу ҳақда Reuters хабар берди.
Хабарга кўра, қурбонлар ёш жуфтлик бўлиб, музейдаги тадбирдан чиққан вақтда ҳужумга учраган.
Полиция воқеа олдиндан режалаштирилганини ва мақсадли амалга оширилганини билдирди. Ҳужумда гумонланувчи — 30 ёшли Чикаго фуқароси Элиас Родригес қўлга олинган. Гувоҳларнинг айтишича, у отишмадан сўнг «Эркин, озод Фаластин!» деб қичқирган.
Исроилнинг АҚШдаги элчиси Ехиел Леитер қурбонлар яқин орада оила қуришни режалаштирганини маълум қилган. АҚШ президенти Доналд Трамп бу ҳужумни антисемитизм асосида содир этилган деб баҳолади.
Вашингтондаги бу даҳшатли антисемитик қотилликлар тўхтатилиши керак! Нафрат ва радикализмга АҚШда ўрин йўқ. Ҳалок бўлганларнинг оилаларига чуқур таъзия билдираман, — деб ёзди Трамп Truth Social тармоғида.
Воқеадан сўнг кенг кўламли рейдлар ўтказилиб, шаҳарнинг бир нечта асосий кўчалари вақтинча ёпилган. Исроил элчихонаси вакилига кўра, икки ходим «яқин масофадан» ўққа тутилган. Элчи воқеа содир бўлган пайтда тадбирда иштирок этмагани айтилмоқда.
Ундан ташқари, бу воқеага Исроил Бош вазири Бенямин Нетаняху, Ташқи ишлар вазири Гидеон Саар, Франция ташқи ишлар вазири Жан-Ноэл Баррот, Европа Иттифоқининг ташқи сиёсат бўйича вакили Кажа Каллас ўз муносабатини билдирган.
