ССВ: «Мамлакатда ўлат касаллиги билан боғлиқ эпидемиологик вазият барқарор»
Давлат чегараларини кесиб ўтиш жойларида 53 та санитария назорат пункти фаолият юритмоқда
Сўнгги кунларда ижтимоий тармоқларда Россия Федерациясининг Иркутск шаҳрида ўлат касаллиги бўйича гумон қилиниш ҳолати қайд этилгани ҳақида хабарлар тарқалди.
Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Атабеков ҳолат юзасидан тушинтириш берди.
Унинг сўзларига кўра, аввало мамлакатда ўлат касаллиги билан боғлиқ эпидемиологик вазият барқарор ва хавотирланишга ҳеч қандай асос йўқ.
Таъкидланишича, Россия Федерациясининг «Роспотребнадзор» ташкилоти расмий маълумотларига кўра, Иркутск шаҳрида кузатилган ҳолатнинг ўлат касаллиги, хусусан, унинг ўпка шакли билан боғлиқ экани ҳозирча тасдиқланмаган. Айни пайтда мазкур ҳолат юзасидан тегишли текширувлар олиб борилмоқда.
Ўлат — бактериялар томонидан чақириладиган ўта хавфли юқумли касаллик. Унинг табиий ўчоқлари дунёнинг айрим ҳудудларида мавжуд. Хасталик асосан майда сут эмизувчи ҳайвонлар орасида учраб, инсонга кўп ҳолларда касалланган ҳайвонлар ва улардаги бургалар чақиши орқали юқиши мумкин, — дейилади хабарда.
Жумладан, мамлакатда шу ва бошқа ўта хавфли юқумли касалликларнинг четдан кириб келиши ва тарқалишининг олдини олишга қаратилган зарур чора-тадбирлар тизими яратилгани билдирилди.
Хусусан, айни пайтда давлат чегараларини кесиб ўтиш жойлари (халқаро аэропортлар, темир йўл станциялари, автомобил йўллари)да 53 та санитария назорат пункти фаолият юритмоқда. Улар орқали хориждан мамлакатга кириб келаётган шахслар доимий тиббий кузатувдан ўтказилади.
Шу билан бирга, ҳудудий санитария-эпидемиология хизматларининг ўта хавфли юқумли касалликларни аниқлашга ихтисослашган лабораториялари зарур диагностик воситалар, озуқа муҳитлар, реагентлар ва реактивлар билан тўлиқ таъминлангани таъкидланди.
