Самарқандда Зебойи Жаҳон тахаллуси билан танилган хонанда эри томонидан ўлдирилгани гумонланмоқда
Самарқанд вилоятининг Тайлоқ туманида 26-июл куни Зебойи Жаҳон тахаллуси билан танилган хонанда Зебинисо Носирова ўлдирилган. Бу ҳақда «Миллар» кўрсатувида хабар берилди.
Маълум бўлишича, қотилликда унинг уйига болаларини кўргани келган эри гумон қилинмоқда. Ўша пайтда турмуш ўртоқлар ўртасида низо келиб чиққан. Шундан сўнг эркак аёлни қўллари билан бўғиб ўлдирган.
Марҳума 1991-йилда туғилган бўлиб, уч фарзанднинг онаси эди.
Синглим бундай тақдирга лойиқ эмас эди. У уч ўғилнинг онаси эди. Қандай қилиб ўз хотинига, болаларининг онасига қўл кўтариш мумкин?, — деди аёлнинг акаси айбдорга энг қаттиқ жазо берилишини талаб қилиб.
Мазкур ҳолат юзасидан 1992-йилда туғилган эркакка нисбатан Ўзбекистон Республикаси Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган. Ҳозирда гумонланувчи ҳибсга олинган.
