Эронда ота гўзаллик салонида ишлагани учун 18 ёшли қизини ўлдирди
Эронда ота гўзаллик салонида ишлаётгани учун 18 ёшли қизини ўлдирди. Бу ҳақда Iran Wire хабар берди.
Хабарга кўра, ҳодиса Исломшаҳр шаҳрида содир бўлган. Фотима Султоний отасининг муносабатидан қўрқиб аёллар гўзаллик салонида яширинча ишлаган.
У отасининг унга ва онасига нисбатан зўравонлик тарихи туфайли мустақил яшаган, дейилади хабарда.
Ота қизининг иш жойини Instagram саҳифасида топган ва мижоз қиёфасида қўнғироқ қилиб, гўзаллик салонига келган. Қиз ташқарида отасини кўргач, ташвишга тушиб, маслаҳат сўраб онасига қўнғироқ қилган.
Аёллар ҳуқуқлари фаоли Пардис Рабиэийнинг таъкидлашича, воқеа гувоҳлари отанинг салон ичига пичоқ билан кириб, ходимлар ва мижозлар кўз ўнгида қизига бир неча бор пичоқ урганини кўрган.
У қизининг сочидан ушлаб, бошини танасидан жудо қилмоқчи бўлган, бироқ атрофдагилар қичқирганида қочиб кетган. Шундан сўнг эркак хотинига қўнғироқ қилиб: «Сени бу қайғу билан қолдирдим» деган.
HRANA янгиликлар агентлиги жиноятчи қўлга олингани, унга нисбатан иш очилгани ҳақида хабар берди.
