Франция парламенти эвтаназияни қонунийлаштирди
Мамлакатда оғир, даволаб бўлмайдиган касалликларга чалинган беморлар учун «ҳаётдан кўз юмишга кўмаклашиш» ҳуқуқи жорий этилади
Франция Миллий ассамблеяси оғир, даволаб бўлмайдиган касалликларга чалинган беморлар учун «ҳаётдан кўз юмишга кўмаклашиш» ҳуқуқини жорий этувчи қонунни маъқуллади. Бу ҳақда Le Monde хабар бермоқда.
Эвтаназияни қонунийлаштиришни 291 нафар депутат қўллаб-қувватлади, 241 нафари эса бунга қарши чиқди.
Ҳаётни ихтиёрий тарк этишга ёрдам бериш ҳуқуқидан фақатгина Франция фуқаролигига ёки ушбу мамлакатда доимий яшаш ҳуқуқига эга бўлган, оғир ва даволаб бўлмайдиган касалликнинг сўнгги ёки терминал босқичида бўлган ҳамда енгиллаштириб бўлмайдиган доимий жисмоний ёки руҳий азоблардан қийналаётган вояга етган беморлар фойдаланиши мумкин.
Қарор ихтиёрий, англанган бўлиши ҳамда шифокорлар томонидан беморнинг сўрови кўриб чиқилганидан кейин унинг ўзи томонидан бир неча бор тасдиқланиши лозим.
Франция президенти Эммануэль Макрон 2022 йилда французларга берган ваъдаси бажарилганини маълум қилди. У қонун лойиҳаси муҳокамасини конструктив ва ўзаро ҳурмат руҳида ўтганини таъкидлади ҳамда ҳаётининг сўнгги палласи муаммосига дуч келган инсонларнинг кўрсатмалари ҳужжат мазмунига таъсир қилганини қайд этди.
Қонун кучга киргач, Франция ушбу амалиётга рухсат берилган давлатлар, жумладан, Бельгия, Нидерландия, Швейцария, Канада ва Уругвай қаторига қўшилади.
