Туркияда юз берган навбатдаги зилзилалар оқибатида учта бино қулаб тушди
Туркия жанубидаги Ҳатай вилоятида яна иккита зилзила содир бўлди.
Туркия ички ишлар вазири Сулаймон Сойлунинг маълум қилишича, зилзила оқибатида камида 3 киши ҳалок бўлган, 213 киши турли жароҳатлар билан шифохоналарга ётқизилган. Унинг сўзларига кўра, ҳозирда қулаб тушган учта бино ҳудудида қидирув-қутқарув ишлари олиб борилмоқда.
Биринчи ер ости силкиниши маҳаллий вақт билан 20:04 да қайд этилган — 6,4 балл, иккинчиси соат 20:07 да содир бўлган — 5,8 балл. Зилзила эписентрлари мос равишда Дефне ва Самандағ туманлари жойлашган.
Биринчи зилзила ўчоғи 16,7 километр, иккинчиси эса 7 километр чуқурликда жойлашган. Зилзила кучи Сурия, Ливан, Иордания, Ироқ, Фаластин ва Исроилнинг қўшни вилоятларида ҳам сезилган. Суриянинг Идлиб, Ҳалаб, Хом каби қатор вилоятлари аҳолиси ваҳимада кўчаларга югуриб чиққан, бир қанча иншоотлар қулаб тушган.
Ливанда ер ости силкиниши бутун мамлакат бўйлаб, жумладан, пойтахт Байрутда ҳам сезилган. AFAD фуқароларни денгиз сатҳи 50 сантиметрга кўтарилиши мумкинлиги сабаб соҳилдан узоқроқда бўлишга чақирган.
Туркия вице-президенти Фуат Октай аҳолидан зарар етган биноларга яқинлашмасликни сўраган. Маълумотларга кўра, 6,4 балли зилзиладан кейин Дефне туманида 32 та афтершоcк қайд этилган. Искандарун шаҳрида бўш уч қаватли бино қулаган, Антакиядаги марказидаги яна иккита иншоотга зарар етган.
