Тошкентдаги мактабда ўқитувчи ўқувчи қизнинг онаси томонидан калтакланди
Тошкент шаҳридаги мактабларнинг бирида ўқитувчи аёл ўқувчи қизнинг онаси томонидан калтакланди.
Жанжал содир бўлган Чилонзор туманидаги мактабнинг директор ўринбосарига кўра, можаро қизлар орасидаги «майда-чуйда келишмовчилик» сабаб юзага келган. Қизлардан бирининг онаси эмоцияга берилиб, синф хонасига кириб, ўқитувчини уриб кетган.
Аниқланишича, қизнинг онаси ўқитувчини «ҳамманинг олдида боламга гапиришга нима ҳаққинг бор?!», дея урган. Шифокорлар берган маълумотларга кўра, ҳозирда ўқитувчининг қон босими юқори бўлгани сабабли уни тўлиқ текширувдан ўтказишнинг имкони йўқ.
Ўқитувчига қўл кўтарган аёлнинг айтишича, педагог унга «ёлғончилар оиласи бўлганидан кейин ёлғончилар оиласи дейманда, қўлингдан келганини қил» деган ва шундан кейин аёл уни урган. Бу вақтда ўқитувчининг ўғли етиб келиб, аёлни ҳам ура бошлаган.
Тошкент шаҳар ИИББ ахборот хизмати раҳбарининг маълум қилишича, ҳолат юзасидан Чилонзор тумани ИИО ФМБ томонидан терговга қадар текширув ўтказилмоқда.
