Тожикистондан гиёҳванд модда олиб киришга уринганлар қўлга олинди

Тожикистондан Ўзбекистонга контрабанда йўли билан 26 кгдан ортиқ гиёҳвандлик воситалари олиб киришга уринган шахслар қўлга олинди. Бу ҳақда ДХХ хабар берди. 

Дастлаб, 1986 йилда туғилган Тожикистон фуқароси давлат чегарасини ноқонуний кесиб ўтаётган вақтда тўхтатиб қолинган. Унга тегишли сумкадан 15 дона ўрамда 14 кг 584 гр гашиш моддаси топилиб, процессуал тартибда расмийлаштирилган.

Шундан сўнг, уни буюртма қилган шахсни аниқлаш юзасидан тезкор тадбир давом эттирилган. Натижада Фарғона вилоятининг Тошлоқ туманида яшовчи шахс Бекобод туманида наркотик моддани қабул қилиб олган вақтида ашёвий далиллар билан ушланган.

Бошқа бир ҳолатда эса, Тошкент вилоятининг Бекобод туманида яшовчи фуқаро контрабанда йўли билан олиб келинган 9 кг 467 гр «опий» моддасини сотаётган вақтида ашёвий далиллар билан ушлангани маълум қилинди.

Терговга қадар текширув давомида аниқланишича, Тожикистон фуқароси томонидан Сурхондарё вилояти ҳудудига етказилган гиёҳванд моддаларни Денов туманида яшовчи фуқаро қабул қилиб олиб, уларни Тошкент вилоятига олиб келган. У ҳам қонуний тартибда ушланган.

Қўқон шаҳрида рўй берган ҳолатда эса, Фарғона—Қўқон йўналишида ҳаракатланаётган Lacetti автомобили тўхтатилиб, унинг салони ва йўловчилари кўздан кечирилганда бир фуқаро ўзининг бел қисмида яшириб олган 1 кг 759 гр гашиш билан қўлга олинган.

Фарғона—Тошлоқ йўналишида ҳаракатланаётган «Запарожец» автомобилида, ҳайдовчининг салон қисмидан ҳам 995 гр «гашиш» моддаси топилган.

Қайд қилинишича, ашёвий далил сифатида олинган жами 26 кг 805 гр гиёҳвандлик воситалари Тожикистон  Республикасидан контрабанда йўли билан олиб келинган.

Ҳолатлар юзасидан Жиноят кодексининг тегишли моддалари билан жиноят ишлари қўзғатилган, тергов ҳаракатлари давом этмоқда.