Россиялик ҳарбий хизматчи Курск вилоятида оилага ўт очди
30 апрелга ўтар кечаси Россиянинг Курск вилояти Беловский тумани Гири қишлоғида қуролланган ҳарбий хизматчи фуқаролар яшайдиган хонадонга кириб, у ерда отишма содир этди. Бу ҳақда “Пепел” Телеграм-канали хабар берди.
Ҳарбий ҳужжатларни текшириш баҳонасида кирган ва оила аъзоларига қарата ўт очган.
Отишма оқибатида 41 ёшли Олеся Ларина ҳалок бўлган, унинг эри эса оғир яраланиб, реанимацияга ётқизилган. Уйда бўлган болалар эса ҳодисадан омон қолган. Гувоҳларнинг айтишича, ҳарбий хизматчи ўзини тажовузкор тутган ва эҳтимол наркотик модда таъсирида бўлган.
Воқеа гувоҳи Александр Зуевнинг сўзларига кўра, Ларинларнинг катта ўғли Иля ёрдам сўраб унга қўнғироқ қилган. Зуев ҳодиса жойига келганида ҳарбий ҳали ҳам уйда бўлган ва унга қарата ўқ узган. У зўрға қочиб чиқиб, қўшнилардан полицияни чақиришни сўраган.
Бир неча дақиқадан сўнг ҳарбий полиция ва шифокорлар етиб келган ва ҳарбий хизматчини қуролсизлантирган. У, гувоҳларнинг айтишича, қизларни машинасига ўтқазмоқчи бўлган ва касб-ҳунар мактаби томон ҳаракатланган. Айнан ўша ерда ҳарбий шифокорлар уни қўлга олишган.
Расмий тергов органлари ҳозирча бу воқеа юзасидан оммавий ахборот воситаларида ҳеч қандай баёнот бермаган.
