Фарғонада алимент тўламаслик учун хотини ва қизини ўлдирган эркакка суд ҳукми ўқилди
Фарғона вилоятининг Ўзбекистон туманида хотини ва қизини ўлдирган эркакка нисбатан суд ҳукми ўқилди. Бу ҳақда «Zamon» информацион дастури лавҳасида хабар берилди.
Воқеа ўтган йилнинг ноябрь ойида содир бўлган. Маст ҳолатда бўлган эркак қайнонасининг уйига, икки фарзанди билан яшаётган хотинининг олдига келган.
Хусусан, аёл эридан алимент ундириш учун судга мурожаат қилган бўлиб, суд қарори билан эркак 15 суткага қамоққа олинган эди. Озодликка чиққанидан кейин у хотинига бир неча марта пичоқ уриб, сўнг икки яшар қизини ҳам пичоқлаган.
Қиз воқеа жойида, аёл эса шифохонага олиб кетилаётганда вафот этган. Эркак ҳодиса жойидан қочиб кетган, бироқ кейинроқ қўлга олинган.
Суд эркакни Жиноят кодексининг 97-моддаси 2-қисми (қасддан одам ўлдириш) «а, в, ж, и» бандлари билан айбдор деб топиб, 19 йил муддатга озодликдан маҳрум қилган.
