Хитой компаниялари Жиззахда 500 МВт қувватли қуёш электр станциясини қуради
Жиззах вилоятининг Фориш туманида 500 МВт қувватга эга қуёш электр станцияси ва унга тегишли ҳаво электр узатиш тармоғи қурилади. Бу ҳақдаги қарор Лех.уз сайтида эълон қилинди.
Президент қарорига кўра, ушбу лойиҳа аҳолини барқарор энергия билан таъминлаш, табиий газдан фойдаланишни камайтириш ва қайта тикланувчи энергия манбаларидан фойдаланишни кенгайтириш мақсадида амалга оширилади.
Лойиҳани Хитойнинг China Electrical Equipment International Cо. LTD ва China Huadian Overseas Cо. LTD компаниялари ташаббуси билан ташкил этилган “Huadian Jizzakh Solar Power” МЧЖ амалга оширади.
Қарорда инвесторлар ва лойиҳа компанияси ҳисобланган “Huadian Jizzakh Solar Power” МЧЖ Жиззах вилоятида ¥2,08 млрд юанлик тўғридан-тўғри инвестицияларни жалб этиб, станцияни лойиҳалаштириши, молиялаштириши, қуриши ва эксплуатация қилиши маълум қилинган.
Ундан ташқари “Ўзенергосотиш” АЖ эса ишлаб чиқарилган электр энергиясини 25 йил давомида кафолатли сотиб олиши белгиланган.
Шунингдек, лойиҳа учун Фориш туманидан 991,1 гектар ер ажратилиб, у саноат ва энергетика мақсадларига мўлжалланган ҳудудга айлантирилади.
Бу лойиҳа 2025 йилнинг апрелида бўлиб ўтган Самарқанд халқаро иқлим форуми доирасида “яшил иқтисодиёт”ни ривожлантиришга қаратилган қатор битимлардан бири ҳисобланади.
