Энди Ўзбекистонда банклар кредит қарздорлигини ечиб олишда минимал қолдиқни сақлаб қоладилар
Маблағлар автоматик равишда ечиб олинганда, қарздорнинг ҳисобрақамларида камида 680 минг сўм қолиши керак
Ўзбекистонда фуқароларнинг банк карталаридан кредитлар ва кафолат мажбуриятларини сўндириш учун маблағларни автоматик равишда ечиб олишга чекловлар жорий этилмоқда. Марказий банк бошқаруви тегишли қарорни қабул қилди.
Ҳужжат тижорат банкларининг банк хизматлари истеъмолчилари билан ўзаро муносабатларини амалга оширишдаги минимал талаблар тўғрисидаги низомга ўзгартиришлар киритишни назарда тутади.
Янги қоидаларга кўра, кредит ёки кафолат мажбуриятларини сўндириш учун маблағлар автоматик равишда ечиб олинганда, банклар мижознинг барча карта ҳисобрақамларида меҳнатга ҳақ тўлашнинг энг кам миқдорининг камида ярми миқдоридаги суммани сақлаб қолишлари шарт.
Ҳозирги вақтда ушбу сумма 680 минг сўмни ташкил этади. Шундай қилиб, агар банк қарздорликни сўндириш учун пулларни автоматик равишда ечиб олса, мижознинг барча банк карталаридаги умумий қолдиқ белгиланган чегарадан пасайиб кетмаслиги керак.
Бу чеклов банк билан тузилган шартномада назарда тутилган, мижознинг алоҳида топшириғисиз маблағларни ечиб олиш операцияларига татбиқ этилади. Янги қоидалар қарор расман эълон қилинганидан уч ой ўтиб — 2027 йил 10 январдан кучга киради.
