Қашқадарёда келинининг ўз жонига қасд қилишига сабаб бўлган қайнона 5 йилга қамалди
Аёл қизни мунтазам равишда калтаклаб, уйдан ҳайдаб чиқарган ва унга руҳий тазйиқ ўтказган
Қашқадарё вилояти Чироқчи туманида келинини ўз жонига қасд қилиш даражасига етказган қайнонага ҳукм ўқилди. Бу ҳақда «Millar» репортажида маълум қилинди.
Маълумотларга кўра, 47 ёшли айбланувчи келинини мунтазам равишда калтаклаб, уйдан ҳайдаб чиқарган ва руҳий тазйиқ ўтказиб келган. Аёл ўз қилмишларини келин гўёки уй-рўзғор ишларини уддалай олмагани билан оқлаган.
Судланувчи келининг ота-онаси билан мулоқот қилишини чеклаган, шунингдек, унга телефондан фойдаланишни тақиқлаган. Аёл келиннинг сочидан судраб, кўчага олиб чиққан ва баданининг турли жойларига урган.
2025 йил октябрь бошида келин уй ҳудудидаги ўз жонига қасд қилган.
Суд аёлни Жиноят кодексининг 103-моддаси 2-қисми «а» банди (ўз жонига қасд қилиш даражасига етказиш) билан айбдор деб топди ва уни 5 йил муддатга озодликдан маҳрум қилиш жазосига ҳукм қилди.
