Нью-Йоркда Мексика ҳарбий кемаси Бруклин кўпригига урилди
17 май куни кечқурун Мексика ҳарбий-денгиз кучларига тегишли Cuauhtémoc номли кема Нью-Йоркдаги Бруклин кўприги остидан ўтаётган вақтда кўприкка урилди. Бу ҳақда NYP хабар берди.
Ҳодиса оқибатида икки нафар экипаж аъзоси ҳалок бўлди, 17 киши тан жароҳати олди. Улардан икки нафарининг аҳволи оғир экани айтилмоқда.
Cuauhtémoc кемаси «хайрихоҳлик сафари» доирасида ҳаракатланаётган бўлиб, бортида 277 киши бўлган. Гувоҳларнинг айтишича, кема кўприк остидан ўтаётганда унинг елканлари кўприкка тегиб кетган ва натижада баъзи денгизчилар елканлардан пастга қулаган.
Мексика президенти Клаудиа Шейнбаум воқеа юзасидан ҳалок бўлганларнинг оила аъзоларига ҳамдардлик билдирган ва Нью-Йорк расмийларига кўрсатилган тезкор ёрдам учун миннатдорлик изҳор қилган.
Расмий маълумотларга кўра, кема 6 апрель куни Акапулко портидан сузиб чиққан бўлиб, унинг мақсади денгиз маданиятини тарғиб қилиш, ҳарбий-денгиз таълимини ривожлантириш ва Мексика халқининг тинчлик ҳақидаги хабарини халқаро миқёсда етказиш бўлган. Кема Нью-Йоркдан сўнг Исландия, Шотландия, Испания ва Буюк Британияга ташриф буюришни режалаштирган бўлган.
