Хоразмда қимор ва «кўча безорилиги» билан шуғулланган шахслар ушланди
Хоразм вилоятида қимор ўйинларини ноқонуний ташкил этиб, «кўча безорилиги» билан шуғулланиб келган бир гуруҳ шахслар қўлга олинди.
Яширин ва уюшган жиноятчиликка мойил, ўз атрофида қонунсиз кўча муҳитини шакллантириб, фуқароларни қўрқитиш ва зўравонлик орқали назоратни ушлаб туришга уриниб келган бир гуруҳ шахслар ушланди.
Хусусан, биринчилардан 29 ёшли «Жомми Даритал» номи билан танилган Ж.А. қўлга олинган. У Урганч бозорида ёш йигитни омма олдида калтаклаб, кейинчалик эса жабрланувчига нисбатан психологик босим ўтказишга уринган. Шунингдек, эркакни қўлга олиш вақтида ундан 3 грамм марихуана топилган бўлиб, бу терговда қўшимча далил сифатида киритилган.
Шу билан бирга, иккинчи гумонланувчи 28 ёшли «Малыш» номи билан танилган А.М. бокс бўйича кўникмаларидан фойдаланиб, аҳолини қўрқитиб келган. Мазкур шахс, танишининг уйига бостириб кириб, уни оила аъзолари олдида «юзма-юз» гаплашиш учун келмаганини сабаб қилиб уни калтаклаган.
Ва учинчи бўлиб, 34 ёшли «Расул-қилич» номи билан танилган Р. Ф. қўлга олинган. Маълумотларга кўра, у таксичилик билан шуғулланган. Жорий йилнинг 13 январ куни Хива — Урганч трассасидаги яна бир таксичини таъқиб қилиб, унинг йўлини тўсган. Шундан сўнг у жабрланувчини уриб-тепиб калтаклаган. Можарони тўхтатишга уринган яна бир фуқарога ҳам қўл кўтарган.
Натижада, учала шахсга нисбатан Жиноят кодексининг 277-моддаси 3-қисми («Безорилик») бўйича жиноят иши қўзғатилган. Тергов ҳаракатлари давом этмоқда.
