Колумбияда сариқ безгак туфайли фавқулодда ҳолат режими эълон қилинди

Колумбия ҳукумати сариқ безгак авж олгани сабаб бутун мамлакат бўйлаб фавқулодда ҳолат эълон қилди, деб хабар бермоқда Reuters.

Соғлиқни сақлаш вазири Гилермо Алфонсо Харамилонинг маълум қилишича, йил бошидан бери 74 кишида ушбу вирус қайд этилган ва 34 киши сариқ безгак оқибатида вафот этган. Мамлакатнинг марказий-ғарбий қисмидаги Толима департаментида вазият оғир. У ерда 22 кишида касаллик аниқланган.

Мазкур ҳудуд ўзининг қаҳва плантациялари ва чиройли пейзажлари билан машҳур бўлиб, у ерга кўплаб туристлар ташриф буюради. 

Соғлиқни сақлаш вазирлиги томонидан эълон қилинган маълумотларга кўра, 2023 йилда икки кишида сариқ безгак аниқланган, 2019 йилдан 2022 йилга қадар эса ушбу вирус билан боғлиқ бирорта ҳолат кузатилмаган.

Сариқ безгак — чивин чақиши оқибатида юқадиган вирусли касаллик. Касалликнинг инкубация даври 3-6 кун. Кучли бел ва бош оғриғи, шунингдек, мушак оғриқлари касаллик белгилари ҳисобланади. Вирусни юқтириб олган шахснинг иштаҳаси йўқолади, кўнгил айниши ва қайт қилишдан азият чекади. Касалликнинг енгил ҳолатида белгилар уч-тўрт кунда ўтиб кетади.

Колумбия президенти эмланмаган фуқароларни Пасха арафаси хавф юқори бўлган ҳудудларга бормасликка чақирди.