Исроил ҳужумлари оқибатида Ғазода 95 киши ҳалок бўлди
13 июль куни сектор бўйлаб уюштирилган ҳужумлар оқибатида 95 нафар фаластинлик ҳалок бўлди. Бу ҳақда Al Jazeera хабар берди.
Қурбонлар орасида сув олишни кутаётган етти бола ва Ғазо шаҳридаги бозор ҳудудида бўлган 17 киши ҳам борлиги айтилган.
Қайд қилинишича, Рафаҳ шаҳрида интернатсион лагерлар ташкил этиш бўйича Исроилнинг режаси халқаро миқёсда кескин танқидга учрамоқда. Исроил мухолифати етакчиси Яъир Лапид, агар фаластинликларга лагерлардан чиқишга рухсат берилмаса, бу ҳолат «концлагер»га айланиши мумкинлигини таъкидлаган.
Шу билан бирга, БМТнинг Ғазодаги саккизта агентлиги етарли ёқилғи бўлмаса, ўз фаолиятини тўхтатишига тўғри келишини билдирган. UNRWA эса якшанба куни сектор ичида очликдан яна бир гўдак вафот этганини маълум қилган.
Шунингдек, янги ҳисоботга кўра, Исроил аскарлари Ғазода фаластинликларга қарши фуқаро дронларидан фойдаланган ҳолда гранаталар ташлаганини тан олган.
