Туркияда ўрмон ёнғинлари оқибатида икки киши ҳалок бўлди

Туркиянинг ғарбий ҳудудларида юзага келган ўрмон ёнғинлари оқибатида икки киши ҳалок бўлди. Бу ҳақда Al Jazeera хабар берди.

Бу ҳақда маҳаллий расмийлар маълумот берган. Одемис шаҳри яқинида ўт ўчириш ишларига жалб қилинган ўрмон хўжалиги ходими ёнғинни бартараф этиш вақтида ҳалок бўлган. Шунингдек, 81 ёшли маҳаллий аҳоли вакили тутун заҳарланиши оқибатида вафот этган.

Туркия ички ишлар органлари маълумотларига кўра, ушбу ёнғин мамлакатнинг ғарбий ҳудудидаги Одемис шаҳри яқинида бошланган бўлиб, унинг тарқалишига кучли шамол ва қуруқ об-ҳаво сабаб бўлган. Айни вақтда мамлакат бўйлаб юзлаб ўт ўчирувчилар, вертолётлар ва самолётлар ёнғин ўчириш ишларига жалб этилган.

Ёнғин натижасида 200 дан ортиқ уй зарар кўрган ёки буткул вайрон бўлган. Маҳаллий аҳолининг эвакуацияси давом этмоқда. Айрим шаҳарларда аҳоли хавфсиз ҳудудларга жойлаштирилмоқда.

Хусусан, Эгей соҳилида жойлашган сайёҳлик шаҳри — Чесме яқинида бошланиб, қуруқ ўтлоқ ва ўрмонларни қамраб олган ёнғин 3 та маҳаллани эвакуация қилишга мажбур қилган. Йўллар ёпилган, автомобилларнинг ҳаракати тўхтатилган. Маҳаллий телевидение ёнғин алангаларининг икки томонлама магистраль йўл бўйлаб тарқалганини намойиш қилган.

Охирги бир ҳафта ичида Туркияда кучли иссиқлик тўлқинлари, намликнинг кескин камайиши ва шамоллар фонида юзлаб ёнғинлар қайд этилган. Мутахассислар бу ҳолатни иқлим ўзгариши билан боғламоқда. Расмийлар вазиятни назоратга олишга уриняпти, бироқ хавф даражаси юқорилигича қолмоқда.

Шу билан бирга, Грецияда ҳам Крит оролида юзага келган ёнғин ўчирилди. Иэрапетра шаҳри яқинида юзага келган ёнғинда 5 минг киши эвакуация қилинган. Ёнғин натижасида ўрмон ва зайтун дарахтларига зарар етган бўлса-да, одамлар орасида талафот йўқ.

Туркия ҳукумати ёнғинларга қарши курашда барча кучларни ишга солганини маълум қилди. Аҳолидан ҳушёрлик ва эвакуация қоидаларига амал қилиш сўралмоқда.