Mебелчиларга халқаро сертификат олиш харажати қоплаб берилади

Мебель экспортини қўллаб-қувватлаш мақсадида халқаро сертификат олиш харажатлари ва хориждан жалб қилинган мутахассисларнинг иш ҳақининг 50% и қоплаб берилади. Бу ҳақда 26 май куни президент раислигидаги йиғилишда хабар берилди.

Xалқаро кўргазмаларда иштирок этувчи тадбиркорларга ижараси қопланадиган майдон 20 квадрат метрдан 40 квадрат метргача кенгайтирилади.

Хабарга кўра, йиғилишда маҳаллий саноатни, хусусан, мебель соҳасини ривожлантириш бўйича янги имтиёзлар эълон қилинди. Унга кўра, мебель ишлаб чиқарувчи ёш тадбиркорларга 7 йил муддатга 5 млрд сўмгача, йиллик 18% ли кредит ажратилади.

Шунингдек, якка тартибдаги тадбиркорларга 5 нафаргача ишчи ёллаб, мебель ишлаб чиқаришга рухсат берилади. Мебель учун 14 турдаги хомашё, фурнитура ва аксессуарлар импортига 3 йил муддатга атиги 1% лик бож белгиланиши бўйича қарор лойиҳаси тайёрланади.

Шароф Рашидов, Янги Наманган, Пастдарғом, Ўртачирчиқ, Қува, Бувайда, Юнусобод ва Учтепа туманларида Хонқа тажрибаси асосида мебелчилик марказлари ташкил этилиши белгиланди.