Тошкент метросининг ТТЗгача бўлган йўналиши икки босқичда қурилади
Тошкент метрополитенининг Тошкент трактор заводи (ТТЗ) даҳасигача бўлган янги йўналиши икки босқичда амалга оширилади. Бу ҳақда Президент матбуот хизмати хабар берди.
Маълум қилинишича, метро йўналишини ТТЗ ҳудудигача олиб бориш режалаштирилган. Президент топшириғи билан лойиҳа маблағ ва қулайлик жиҳатидан мақбуллаштирилиб, икки босқичли вариант ишлаб чиқилган.
Биринчи босқичда Чилонзор йўлининг Пушкин бекатидан Мирзо Улуғбек туманидаги Феруза даҳасигача ер усти метро қурилиши кўзда тутилган. Иккинчи босқичда эса ушбу йўналиш ТТЗ даҳасидаги Шоҳ бекатигача узайтирилади.
Президент матбуот хизматининг хабарига кўра, айни вақтда мазкур ҳудуддан кунига 47 минг автомобиль орқали 194 минг йўловчи пойтахт марказига кириб келмоқда. Янги йўналиш орқали эса ҳар куни 85 минг йўловчини ташиш режалаштирилмоқда.
Тақдимотда лойиҳанинг техник ва амалий жиҳатлари батафсил кўриб чиқилди.
