Россияда мигрантлар учун давлат божи жорий этилди
Россияда чет эл фуқаролари миграция органларида рўйхатдан ўтиш ва яшаш жойини белгилаш учун эндиликда давлат божи тўлаши лозим бўлади. Бу ҳақда ТАСС агентлиги хабар берди.
Янги тартибга кўра, мигрантлар Россияда қонуний яшаш ва ишлаш ҳуқуқини берувчи патентни олиш учун ҳам давлат божи тўлайди. Аввал бу жараён учун тўлов белгилаб қўйилмаган эди.
Расмийларга кўра, бу ўзгариш икки асосий сабабга кўра жорий этилган: биринчидан, мамлакатда қанча мигрант борлигини аниқлаш ва уларнинг яшаш жойини назорат қилиш; иккинчидан, ҳужжатларни расмийлаштириш билан боғлиқ харажатларни қоплаш.
Шунингдек, ҳукумат виза билан келган ва рухсатнома учун тўлов қилаётган мигрантлар билан визасиз кириб, патент орқали ишлаётган шахслар учун тенг шартлар яратишни мақсад қилган. Эндиликда, фуқаролар кириш усулидан қатъи назар, ишлаш ҳуқуқини берувчи ҳужжатларни расмийлаштиришда бир хил давлат божини тўлашлари талаб этилади.
