АҚШ тўрт давлат фуқароларининг муҳожирлик мақомини бекор қилди
АҚШ Ички хавфсизлик департаменти 12 июнь куни Куба, Гаити, Никарагуа ва Венесуэла фуқароларининг Қўшма Штатларда вақтинчалик яшаб, ишлашига рухсат берган дастур тўхтатилганини маълум қилди. Бу ҳақда CNN хабар берди.
Департамент баёнотига кўра, ушбу тўрт давлат фуқаролари шартли равишда мамлакатга киришга рухсат берилган, бироқ эндиликда бу рухсат бекор қилинган. Шунга кўра, улар мамлакатни тарк этиши лозим. Акс ҳолда, куч билан депортация қилиниши мумкинлиги ҳақида огоҳлантириш хатлари юборилган.
Мазкур дастур Жо Байден маъмурияти томонидан 2023 йилда ишга туширилган бўлиб, қонуний ҳомийга эга бўлган ва хавфсизлик текширувларидан ўтган ариза топширувчиларга АҚШга вақтинча киришга имкон берилган эди. Дастур бир қанча танқидлар ва ҳуқуқий тортишувларга сабаб бўлган.
Аввалроқ Доналд Трамп мазкур дастурни бекор қилишни назарда тутувчи фармонни имзолаган, бу эса Олий судгача етган ҳуқуқий жараёнларни юзага келтирган.
Эслатиб ўтамиз Трамп 9 минг ноқонуний мигрантни Гуантанамо қамоқхонасига юбормоқчилиги ҳақида хабар бергандик.
