Марказий банк Ўзбекистон мустақиллигининг 35 йиллигига бағишланган эсдалик тангаларини чиқарди

Тангалар 999,9 пробали олтин ва кумушдан зарб қилинган

Ўзбекистон Марказий банки мамлакат мустақиллигининг 35 йиллигига бағишланган олтин ва кумушдан тайёрланган эсдалик тангалари коллекциясини муомалага чиқарди. Бу ҳақда ташкилот матбуот хизмати хабар берди.

Учта тангадан иборат коллекция Ўзбекистоннинг миллий давлатчилиги, тарихий мероси, миллий қадриятлари ва замонавий тараққиёт ғояларини ягона бадиий концепцияда акс эттиради. Коллекциядаги ҳар бир танга мустақиллик даврининг муҳим рамзлари ва қадриятларини ўзига хос композиция орқали ифодалайди.

Коллекциянинг биринчи тангасида халқнинг озодлиги, миллий ғурури ва мустақил давлатчилиги тимсоли сифатида Мустақиллик монументи тасвирланган. Монумент ортидан таралаётган қуёш нурлари истиқлол берган имкониятлар ва ёруғ келажак рамзи сифатида талқин этилган, — дейилади хабарда.

Танганинг реверс қисмида Ўзбекистон Республикасининг Давлат байроғи ва унинг қабул қилинган санаси – 1991-йил 18-ноябрь акс эттирилган.

Иккинчи танга Ўзбекистоннинг тарихий ва маънавий меросига бағишланган. Унинг аверс қисмида Тошкент шаҳридаги Ислом цивилизацияси маркази тасвирланган.

Мазкур меъморий образ мамлакатимизнинг жаҳон илм-фани, маънавияти ва ислом цивилизацияси ривожига қўшган ҳиссасини ифодалайди. Танганинг реверс қисмида Ўзбекистон Республикасининг Давлат герби ва унинг қабул қилинган санаси – 1992-йил 2-июль акс эттирилган, — деб таъкидланди.

Композиция давлат суверенитети, миллий бирлик ва мустаҳкам давлатчилик ғояларини мужассам этади. Коллекциянинг учинчи тангасида «35» рақами асосий композицион элемент сифатида акс эттирилган.

Унинг нафис ва замонавий талқини мустақилликнинг бардавомлиги ҳамда тарихий масъулиятнинг янги авлодларга ўтишини ифодалайди, — дейилади хабарда.

Реверс қисмида Ўзбекистон Республикаси Давлат мадҳиясидан олинган «Оламни маҳлиё айлаган диёр!» сатри ва Мадҳиянинг қабул қилинган санаси – 1992-йил 10-декабрь акс эттирилган. Дизайнда миллий ўзига хосликни ифодалаш учун дўппи нақшларидан ҳам фойдаланилган.

Эсдалик тангалари 999,9 асилликдаги олтин ва кумушдан зарб этилган бўлиб, ҳар бир танганинг оғирлиги 31,1 грамм, номинал қиймати эса 100 000 сўмни ташкил этади.

Тангалар уч донадан иборат коллекция тўплами кўринишида, шунингдек, коллекциядаги тангалар ҳар бири алоҳида ҳолда сотувга чиқарилади.

Олтин эсдалик тангаларининг дастлабки тиражи 450 дона, кумуш тангаларнинг дастлабки тиражи эса 800 донани ташкил этади. Уларнинг тиражи бозор эҳтиёжидан келиб чиқиб оширилиши мумкин.

Эсдалик тангалари 27-августдан бошлаб 690та тижорат банклари филиалларида сотувга чиқарилади.