Тошкентда 230 млн сўмлик iPhone 17 Pro Max смартфонларини ноқонуний олиб кирганлар ушланди
Халқаро Тошкент аэропортида iPhone смартфонларини ноқонуний олиб киришга уринганлар тўхтатилди. Бу ҳақда «Тошкент-АЭРО» махсус божхона комплекси матбуот хизмати хабар берди.
Тезкор тадбир давомида, «Доҳа-Тошкент» йўналиши бўйлаб учиб келган Ўзбекистон фуқароси божхона назорати зонасининг «яшил» йўлаги орқали ҳаракатланганидан сўнг тўхтатилиб, унинг ўзи ва багажлари кўздан кечирилган.
Натижада фуқарога тегишли бўлган юклар орасидан божхона назоратига тегишли тартибда тақдим этилмаган, йўловчи божхона декларациясида ёзиб кўрсатилмаган дастлабки тахминий қиймати 230 000 000 млн сўмлик жами 9 дона «iPhone 17» русумли уяли алоқа воситалари борлиги аниқланди.
Ушбу мобил воситалар ҳуқуқбузарлик ашёси сифатида вақтинча сақловга олинди.
Ҳолат юзасидан фуқарога нисбатан тегишли процессуал ҳужжатлар расмийлаштирилиб, божхона суриштирув жараёнлари олиб борилмоқда.
