Самарқандда 740 млн сўмлик олтинни ноқонуний сотганлар ушланди
Самарқанд вилоятининг Каттақўрғон туманида ноқонуний олтин савдоси билан шуғулланган шахслар фош бўлди. Бу ҳақда давлат хавфсизлик хизмати хабар берди.
Хусусан, 3 нафар фуқаро қонунга хилоф равишда жами оғирлиги 475 гр. ташкил қилган 2 бўлак олтин қуймаларни харидорга 737 млн сўмга сотишга келишиб, олиндан 500 млн сўм олган вақтларида ашёвий далиллар билан ушланади.
Давлат асиллик даражаси назорати инспекциясининг тегишли хулосасига кўра, 994 асиллик даражасидаги ушбу олтин қуймаларнинг соф оғирлиги 472 гр бўлиб, умумий қиймати 740,4 млн сўмни ташкил этади.
Ҳозирда мазкур шахсларга нисбатан Жиноят Кодексининг 177-моддаси (валюта қимматликларини қонунга хилоф равишда олиш ёки ўтказиш) 4-қисми «а» банди билан жиноят иши қўзғатилиб, тергов ҳаракатлари олиб борилмоқда.
Таъкидланишича, мазкур шахсларнинг 2 нафари муқаддам судланган бўлиб, улардан бири ҳозирда ахлоқ тузатиш ишлари жазосини ўтаётган бўлган.
