Ёзги oромгоҳларга йўлланмани онлайн олиш хизмати ишга туширилди
Эндиликда ота-оналар 7−14 ёшли фарзандлари учун ёзги соғломлаштириш оромгоҳларига йўлланмаларни my.gov.uz порталида онлайн тарзда олишлари мумкин. Бу ҳақда портал телеграм каналида хабар берилди.
Янги жорий этилган хизмат орқали фойдаланувчилар қулай мавсум ва оромгоҳни танлаб, уйдан чиқмасдан ариза топширишлари, тўловни амалга оширишлари ва электрон йўлланмани олишлари мумкин.
Хизматдан фойдаланиш учун my.gov.uz порталида «Болалар оромгоҳларига йўлланма олиш учун ариза бериш» бўлими танланади. Сўнг йўлланман олмоқчи бўлган фарзанд танланиб, оромгоҳ ва мавсум кўрсатилади ҳамда тўлов амалга оширилади.
Йўлланма тўловдан сўнг автоматик тарзда шаклланади. Банд қилинган йўлланма учун 30 дақиқа ичида тўлов амалга оширилмаса, у бекор қилинади ва қайта сотувга чиқарилади.
Шунингдек, Ўзбекистон Республикаси фуқаролари фарзандлари учун йўлланма нархининг 50% миқдори Болалар соғломлаштириш ва аҳоли саломатлигини тиклашга кўмаклашиш жамғармаси ҳисобидан қоплаб берилади.
Бунда порталдаги йўлланма нархлари ушбу компенсация пули инобатга олинган ҳолда шакллантирилади.
