Рим папаси 88 ёшида вафот этди
Рим папаси Франциск 21 апрель куни 88 ёшида вафот этди. Бу ҳақда Ватикан баёнотига таяниб Reuters хабар берди.
Папа 88 ёшда эди. Февраль ойи ўрталарида у бронхитни даволаш учун Римнинг «Жемелли» клиникасига ётқизилган, сўнгра текширувлар икки томонлама пневмония бошланганини кўрсатган. Папа касалхонада беш ҳафта ётган, тўрт марта нафас олиш инқирозини бошдан кечирган, унинг ҳаёти икки марта хавф остида қолди, дейилади баёнотда.
23 март куни Понтифик касалхонадан чиққан. Шундан сўнг у омма олдида фақат бир марта кўринган бўлса-да, бир нечта расмий учрашувлар ўтказган. Жумладан, апрель ойи бошида Буюк Британия қироли Чарльз III билан, Пасха шанбасида эса АҚШ вице-президенти Жей Ди Венс билан учрашган.
Папа 2013 йилдан бери Рим-католик черкови раҳбари ҳисобланади. Шу вақт мобайнида у тўрт марта касалхонага ётқизилган. 2021 йилда қорин бўшлиғида оғир жарроҳлик амалиётини бошдан кечирган. 2023 йилда эса чандиқ тўқималари ва қорин чуррасини даволаш мақсадида яна бир операция қилинган.
