«Дўстим, сенга шунақа муносабатлар керакми?»: блогер аёлларга қарши зўравонликни тарғиб қилувчи видео суратга олди

Видеороликда йигит қизни жағига уриб юборган.

Блогер Сухробиддин Мухториддинов аёлларга нисбатан зўравонликни тарғиб қилувчи видеоролик суратга олди. Бу ҳақда Nemolchi.uz лойиҳаси хабар берди.

«Sizga bunday “отношения” kerak emas» номли видеода урушаётган қиз ва йигит акс этган. Буни кўриб, блогер: «Уларга ёрдам керак шекилли», – деб ўйлайди. Шундан сўнг у қизнинг олдига келиб, унинг жағига уриб юборади. Кейин у йигитни қучоқлаб: «Дўстим, сенга шунақа муносабатлар керакми?», – деб сўрайди.

Nemolchi.uz ҳуқуқ-тартибот органларига мурожаат қилиб, бундай видеолар тарқалишининг олдини олишни сўради.

«Буни шунчаки кўнгилочар контент эмас, зўравонлик тарғиботи дея қабул қилиш вақти келмадимикан? Бундай ҳатти-ҳаракат зўравонлик орқали машҳурликка эришиш йўлини қидираётганлар орасида янги трендга айланмаслиги учун зарур чора-тадбирларни кўриш лозим», – дейилган хабарда.