Тошкентда Қурилиш вазирлигининг бош мутахассиси пора билан ушланиб, қочмоқчи бўлди
Тошкентда Қурилиш ва уй-жой коммунал хўжалиги вазирлиги бош мутахассиси пора билан қўлга тушди. Бу ҳақда Давлат хавфсизлик хизмати хабар берди.
Аниқланишича, бош мутахассис Юнусобод туманидаги 6 та уйга хизмат кўрсатишни бир МЧЖдан иккинчи МЧЖга ўтказиш ҳақидаги уй-жой мулкдорлари имзолаган далолатномаларни биллинг тизимининг «Менинг уйим» платформасидан рўйхатдан ўтказиб бериш эвазига 2200 АҚШ доллари талаб қилган ва бу ишларни ўзининг мансабдор танишлари орқали ҳал қилиб беришни режалаштирган.
Хусусан, ушбу мансабдор пойтахтдаги кўп қаватли уйларга хизмат кўрсатувчи МЧЖ раҳбарининг ишончига кириб, ундан 1500 АҚШ доллари олган вақтида ушланади.
Қўлга олиш жараёнида у қочишга уринган, бироқ тезкор ходимлар томонидан ушлаб қолинган.
Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
