Наманганда қоидани бузган ҳайдовчиларга чора кўрилди
Наманганда рулда ош еган ва машинасига кондиционер ўрнатган ҳайдовчилар жавобгарликка тортилди. Бу ҳақда Наманган ЙҲХБ хабар берди.
Яқинда ижтимоий тармоқларда кенг жамоатчилик эътирозига сабаб бўлган бир нечта йўл ҳаракати қоидабузарликлари акс этган видеолар тарқалган эди. Аниқланишича, иккала ҳолат ҳам Наманганда рўй берган.
Ҳайдовчилардан бири Damas автомобилига уй ва офисларга мўлжалланган кондиционер ўрнатиб, у билан шаҳарнинг гавжум кўчаларида ҳаракатланиб юрган.
Бошқа бир ҳолатда эса блогер автомобилни бошқараётганда палов еб, хавфли вазият юзага келтирган.
Ҳар иккала ҳайдовчи ҳам жавобгарликка тортилиб автомобиллари жарима майдончасига жойлаштирилди.
