Google АҚШ судида энг оғир санкциялардан қутулиб қолди

АҚШ федерал суди Google’нинг қидирув бозоридаги монополиясини тугатиш бўйича иш юзасидан қарор чиқарди. Унга кўра Chrome ва Android’ни сотиш ҳақидаги Адлия вазирлигининг талабини қабул қилинмади, деб Bloomberg хабар берди.

Суд қарорига кўра, компанияга қидирув соҳасида эксклюзив шартномалар тузишга йўл қўйилмайди. Шунингдек, Google олти йил мобайнида ўз маълумотларини Microsoft, DuckDuckGo, шунингдек сунъий интеллект яратаётган OpenAI ва Perplexity’га очиб бериши керак бўлади.

Шу билан бирга, Google Адлия вазирлигининг Chrome ва Android’ни сотиш талабидан қутулиб қолди ва Apple билан тузилган келишувни ҳақли деб топди. Унга кўра, Google ҳар йили асосий қидирув хизмати сифатида қолиш учун 20 миллиард доллардан ортиқ маблағ ажратади.

Таҳлилчилар суд қарорини Google ва Apple учун ғалаба сифатида баҳоладилар. Қайд этилишича, бу қарор икки компаниянинг сунъий интеллект соҳасидаги кейинги ҳамкорлигига йўл очади. Суд қароридан сўнг, Alphabet акциялари 8,7% га, Apple акциялари эса 4,3% га кўтарилди.