Эҳтиёжманд хотин-қизлар учун ОТМга киришда тавсиянома олиш бўйича аризалар қабули бошланди

Эҳтиёжманд оилалардаги хотин-қизларга 2025/26-ўқув йили учун ОТМларга киришга тавсиянома олиш учун аризалар қабули бошланди. Бу ҳақда Оила ва хотин-қизлар қўмитаси ахборот хизмати раҳбари Саодат Боймирзаева хабар берди.

Қайд қилинишича, тавсияномани олиш истагидаги номзодлар 2025-йил 30-майдан 8-июнгача аризани онлайн тарзда tavsiyanoma.ijro.uz платформаси орқали топширишлари мумкин бўлади.

• тавсиянома қуйидаги олти тоифа вакилларига тақдим этилади:

• кам таъминланган оилалардаги хотин-қизлар;

• тўлиқсиз оилада тарбияланаётган ижтимоий ҳимояга муҳтож қизлар;

• турмуш ўртоғи вафот этган, фарзандини ёлғиз тарбиялаётган аёллар;

• ногиронлиги бўлган фарзанди бор аёллар;

• ижарада ёки алоҳида яшаб, икки ва ундан ортиқ фарзандини тарбиялаётган ёлғиз аёллар;

• oта-онасидан бири ёки ҳар иккаласи 1- ёки 2-гуруҳ ногирони бўлган хотин-қизлар.

Тавсиянома эгаси бўлган абитуриентлар фақат танлаган биринчи таълим йўналиши бўйича қўшимча 4% лик давлат гранти асосида танловда иштирок этиш имкониятига эга бўлади. Кириш имтиҳонларида энг юқори баллнинг камида 30% ини тўплаган тавсиянома эгалари баллар кетма-кетлигига мувофиқ талабаликка тавсия этилади.