Технопаркдаги ёнғинда икки киши вафот этди
Бугун соат 07:01 да Тошкент шаҳри Яккасарой туманидаги технопарк ҳудудида ёнғин содир бўлди. Бу ҳақда ФВВ матбуот хизмати хабар берди.
Маълум қилинишича, ҳудудаги синтефон ишлаб чиқариш цехида ёнғин чиққан. Ёнғин ҳақидаги хабар келиб тушгач, ёнғин-қутқарув экипажлари соат 07:04 да воқеа жойига етиб борган. Ёнғин соат 07:45 да қуршаб олиниб, 08:09 да тўлиқ бартараф этилган.
Ёнғин натижасида икки нафар фуқаро вафот этган, тан жароҳати олган беш киши шифохонага юборилган.
ФВВ маълумотларига кўра, ёнғин ишлаб чиқариш жараёнидаги технологик қоидабузарлик сабаб юзага келган бўлиши мумкин.
Ёнғинни ўчиришга 11 та асосий ва 6 та махсус ёнғин ўчириш техникаси жалб этилган. Ёнғин натижасида цехнинг тахминан 700 квадрат метр майдони зарарлангани келтирилган.
Ҳозирда воқеа юзасидан дастлабки тергов олди суриштирув ишлари олиб борилмоқда.
