Дональд Трамп Ўзбекистонга ташриф буюрмоқчи — АҚШ президентининг махсус вакили
АҚШ раҳбари аввалроқ Шавкат Мирзиёев томонидан таклиф этилган эди
АҚШ президенти Дональд Трамп Ўзбекистонга ташриф буюрмоқчи. Бу ҳақда АҚШ президентининг глобал шериклик бўйича махсус вакили Паоло Замполли «Ўзбекистон 24» телеканалининг «Таҳлилнома» дастурига берган интервьюсида маълум қилди.
Замполлининг сўзларига кўра, Трамп республикага келиш истаги борлигини шахсан ўзига айтган.
Мен унинг Ўзбекистонга келишни хоҳлашини биламан. Президентнинг иш жадвали жуда тиғиз. Лекин у менга Ўзбекистонга ташриф буюриш нияти борлигини айтган эди, — деди махсус вакил.
Замполли ушбу ташрифни ташкиллаштириш устида ишлаётганини ва у яқин орада бўлиб ўтишига умид қилишини қўшимча қилди. Шу билан бирга, Трампнинг эҳтимолий ташрифининг аниқ муддатлари ҳозирча очиқланмаган.
Эслатиб ўтамиз, 7 август куни Шавкат Мирзиёев ва Дональд Трамп телефон орқали мулоқот қилган эди. Суҳбат давомида Ўзбекистон президенти Америка етакчисини ўзи учун қулай вақтда мамлакатимизга расмий ташриф билан келишга таклиф этди.
