Ўзбекистонда шубҳали операцияларни тўхтатиб туриш тартиби ўзгартирилди

Ўзбекистонда шубҳали операцияларни тўхтатиб туриш тартибига оид низом тасдиқланди.

Маълум бўлишича, бош прокурорнинг буйруғи билан «Террорчилик фаолиятида ёки оммавий қирғин қуролини тарқатишда иштирок этаётган ёки иштирок этишда гумон қилинаётган шахслар рўйхатига киритилганларнинг операцияларини тўхтатиб туриш, пул маблағларини ёки бошқа мол-мулкини ишга солмай тўхтатиб қўйиш, ишга солмай тўхтатиб қўйилган мол-мулкидан фойдаланишга рухсат бериш ва операцияларини тиклаш тартиби тўғрисида»ги низом тасдиқланган.

Қайд этилишича, мазкур низомда террорчилик фаолиятида ёки оммавий қирғин қуролини тарқатишда иштирок этаётган ёки иштирок этишда гумон қилинаётган шахслар рўйхатини шакллантириш ҳамда бу рўйхатни пул маблағлари ёки бошқа мол-мулк билан боғлиқ операцияларни амалга оширувчи ташкилотларга етказиш тартиби белгиланган. Айтилишича, рўйхат Ўзбекистоннинг ваколатли органлари томонидан тақдим этиладиган маълумотлар, шунингдек, чет давлатларнинг ваколатли органларидан ҳамда халқаро ташкилотлардан расмий каналлар орқали олинган маълумотлар асосида махсус ваколатли давлат органи томонидан шакллантирилади.

Таъкидланишича, Давлат хавфсизлик хизмати, Ички ишлар вазирлиги, Бош прокуратура ва Саноат хавфсизлиги давлат қўмитаси ваколатли органлар ҳисобланади. Улар рўйхатни шакллантириш учун махсус ваколатли давлат органига ушбу низомнинг 6-бандида назарда тутилган маълумотларни тасдиқловчи ҳужжатларнинг кўчирма нусхаларини илова қилинган ҳолда тақдим этади. Маълумотлар олинган пайтдан бошлаб ёки шахсни рўйхатга киритиш учун асослар юзага келган вақтдан бошлаб бир иш куни мобайнида тақдим этилади. Махсус ваколатли давлат органи томонидан маълумотлар «Электрон жиноий-ҳуқуқий статистика» ягона ахборот тизимидан фойдаланган ҳолда ҳам олинади.

Айтилишича, олинган маълумотлар тўлиқ бўлмаса ёки ноаниқ бўлса, махсус ваколатли давлат органи қўшимча маълумот олиш учун маълумотлар базаларидан фойдаланади ёки тегишли ваколатли органларга мурожаат қилади. Улар эса сўровни олган кундан бошлаб уч иш куни давомида қўшимча маълумотларни тақдим этади. Таъкидланишича, бундан уларни тақдим этиш учун хорижий давлатларнинг ваколатли органлари ёки халқаро ташкилотларга мурожаат қилиш зарур бўлган ҳолатлар мустасно ҳисобланади. Махсус ваколатли давлат органи ушбу масала ҳал этилгунга қадар мазкур шахсларнинг операцияларини 30 иш кунидан кўп бўлмаган муддатга тўхтатиб қўйиши мумкин бўлади.

Махсус ваколатли давлат органи қуйидаги муддатларда рўйхатни шакллантиради ҳамда унга ўзгартириш ва қўшимчалар киритади:

• маълумотлар Бирлашган Миллатлар Ташкилоти Хавфсизлик кенгашининг расмий веб-сайтидан олинган вақтдан бошлаб бир соат ичида;
• маълумотлар ваколатли органлардан ёки хорижий давлатларнинг ваколатли органларидан келиб тушган ёхуд «Электрон жиноий-ҳуқуқий статистика» ягона ахборот тизимидан олинган вақтдан бошлаб дарҳол, бироқ иш куни тугамасдан.

Махсус ваколатли давлат органи рўйхатни шакллантирган ёки унга тегишли ўзгартиришлар киритгандан сўнг бир соат ичида уни пул маблағлари ёки бошқа мол-мулк билан боғлиқ операцияларни амалга оширувчи ташкилотларга етказади. Ташкилотнинг масъул ходими (тармоғи) уч соат ичида рўйхатни ушбу ташкилотнинг тегишли ходимларига (тармоқларига), шу жумладан, мижозлар билан бевосита ишлайдиган ходимларга (тармоқларга) юборилишини ва ундан фойдаланиш имкониятини таъминлайди.

Ташкилотлар қуйидаги ҳолатларда кечиктирмасдан ва олдиндан хабар қилмасдан операцияни амалга оширишни тўхтатиб туради ва пул маблағларини ёки бошқа мол-мулкини ишга солмай тўхтатиб қўяди:

• мижоз ёки операция қатнашчиларидан бирининг идентификацион маълумотлари рўйхатга киритилган шахснинг маълумотлари билан тўлиқ мос келганда;
• рўйхатга киритилган шахснинг пул маблағлари ёки бошқа мол-мулки аниқланган тақдирда.

Қайд этилишича, ташкилот бир иш кунидан кечиктирмасдан шубҳали операция тўғрисида махсус ваколатли давлат органига хабар қилиши шарт.

Шунингдек низомда қуйидагилар белгиланган:

• террорчилик фаолиятида ёки оммавий қирғин қуролини тарқатишда иштирок этаётган ёки иштирок этишда гумон қилинаётган шахсларни рўйхатдан чиқариш тартиби;
• шахсларни рўйхатга киритиш тўғрисидаги қарор устидан шикоят бериш тартиби;
• тўхтатиб турилган операцияларни тиклаш, пул маблағлари ёки бошқа мол-мулкни ишга солмай тўхтатиб қўйишни бекор қилиш ва улардан фойдаланишга рухсат бериш тартиби;
• операцияларни тўхтатиб туриш ва (ёки) пул маблағларини ёки бошқа мол-мулкни ишга солмай тўхтатиб қўйиш масалаларига доир халқаро ҳамкорлик.

Қайд этилишича, ҳужжат қонун ҳужжатлари маълумотлари миллий базасида эълон қилинган ва 2021 йил 19 октябрдан кучга кирган.