Бир йил ичида Европа ҳудудида қизамиқ билан касалланиш ҳолати 30 баробар кўпайди
Мутахассислар қизамиқ билан курашишнинг ягона чораси вакцинация эканлигини таъкидламоқда.
ЖССТ 2023-йилда Европа ҳудудида қизамиқ билан касалланиш ҳолати 30 баробар ошганини қайд этди, хабар бермоқда ТАСС.
2023-йилнинг январь ойидан октябрь ойига қадар ҳудуддаги 53 давлатдан 40 тасида 30 мингдан ортиқ қизамиқ ҳолати аниқланган. Бутун 2022-йил давомида аниқланган 941 ҳолат билан солиштирганда, бу касалликнинг 30 баробар ошганини кўрсатади.
ЖССТнинг Европа бўлими таъкидлашича, вакцинация — қизамиқ билан курашишнинг ягона чорасидир.
«Биз ушбу ҳудудда нафақат қизамиқ касаллигининг 30 баробар ошганига, балки 21 минг нафар беморнинг шиохонага ётқизилгани ва 5 нафар бемор ҳаётдан кўз юмганига гувоҳ бўлмоқдамиз. Бу бизни ташвишга солмоқда. Вакцинация бўйича тезда кучимизни сафарбар этишимиз лозим, токи касалликнинг юқиши тўхтасин ва тарқалиб кетишининг олди олинсин», – хабар беришди ташкилотдагилар.
2023-йилда қизамиқ касаллигининг 5 дан 2 ҳолати 1 ёшдан 4 ёшгача болаларга, 5 дан бири эса — 20 ёшдан катталарга тўғри келарди. Йил бошидан октябрьга қадар икки мамлакатда 20 918 нафар бемор шифохонага ётқизилиб, 5 нафар бемор ҳаётдан кўз юмган.
