Тошкент халқаро аэропортида заргарлик буюмларини яширинча олиб кирмоқчи бўлганлар тўхтатилди
Тошкент халқаро аэропортида қарийб 1 млрд сўмлик заргарлик буюмларини яширинча олиб кирмоқчи бўлганлар тўхтатилди. Бу ҳақда Toshkent-Aero ихтисослаштирилган божхона комплекси хабар берди.
Маълум қилинишича, Дубай–Тошкент йўналиши бўйича учиб келган уч нафар фуқаро белгиланган тартибда божхона назоратидан ўтказилган.
Натижада фуқаролар томонидан яширилган, божхона ходимларининг оғзаки сўровида маълум қилинмаган заргарлик буюмлари борлиги фош этилган.
Аниқланган заргарлик буюмларининг умумий оғирлиги 781 граммни, тахминий ҳисоб-китобларга кўра қиймати эса салкам 970 млн сўмни ташкил этган.
Ҳозирда ушбу заргарлик буюмлари ашёвий далил сифатида сақловга олиниб, ҳолат юзасидан суриштирув ишлари олиб борилмоқда.
